Сцена другая

Иван Франко

Ангел до Христа с келихом.

Ангел

Вырок отца твоего ест еще пред вѣки,

Абысь поднял, Христе мой, смерть за человѣки.

З чим мя тераз до тебе отец присылает,

Абысь келих той выпил, о то тя жадает.

Христос

А то ще есть, Ангеле? Чи юж то до бою?

Чи юж то и ангелы воюют зо мною?

Що-м такого провинил, же мя преслѣдуют,

Чловеци и ангели смерть на мя готуют?

Вижу, земля и небо зброю на ся взяло,

Бы як неприятеля мене поконало.

Ей, принамнѣ, ангеле, вспомни собѣ тое,

Жем я есть твой створитель, ты створеніе мое.

Из иншого, молю тя, участуй мя здрою,

Понехай ребелію, отдали преч зброю!

Ангел

Милосердный мой пане и боже Сіону!

Я-м нанизший есть слуга у твоего трону,

И всѣ хоры ангелов тобѣ ся кланяют,

Ребелии жадной, господи, не знают,

Всѣ на твою услугу без жадной вымовы

За намнѣйшим скиненем завше суть готовы.

А же тераз таким тя келихом частую,

Вѣдаеш, же твоему отцу услугую.

Он мя выслал до тебе, и оные муки

Приказал ми конечне, абым ти дал в руки.

Прийми теды, Ісусе, той келих от мене

И выпий за чловѣка грѣшнаго забавеніе!

Христос

О отче мой небесный, отче добротливый!

Спул-судія, спул-творче, спул-боже правдивый!

Чи юже ся то тобѣ стескнило за мною,

Же мешкаю от вѣка, отче мой, с тобою?

Чи южесь то умыслил мене, сына, збыти,

Кгды ми ангелом кажеш так горце служити?

Ей отче, отче мой, любо тя ображают

Люде, лепей ся еднак у тебе мевают.

Тысь выправил ангелов до Лотова дому,

Бы го пред западненем вывели з Содому.

З твоего розказаня ангел з рыбы жолчи

Товии дал старому лекарство на очи.

З твоей воли Даниил в яскини зе лвами

Жил беспечне, бось го стрегл з своими слугами.

А ку минѣ сынови, милости не маеш,

На мое затраченя ангелов зсылаеш,

Нехай же, отче, нехай, литость твоя прийдет!

Кажи, нехай от мене чаша та отийдет!

Чи такіе у тебе, отче несмертелный,

На емпири предвѣчном походят цистерны?

Чи такое ся родит вино в твоей винници?

Чи такіе у тебе жродла и криници?

Вѣдаю же и люде з ангелы посполу

З лѣпшого пют келиха у твоего столу.

Вѣдаю, же и звѣри, коли наповаеш,

Прагненя их, о отче, завше угашаеш.

А на мене не хочеш милосердным быти,

Хочеш мя так срокгою смертю упоити.

Да мимо идет прето, отче, чаша сия!

Учини для своея милости святыя!

Ангел

Юж то есть не от мене, Христе мой коханый, –

От отца предвічнаго декрет ферованый,

Абысь рачил той келих приняти от мене,

И отважне выпити за свое створене.

Христос

О як же ся, нестийтеж, тераз ошукалем,

Же ся от вас помоги з неба сподѣвалем!

Хвалилем ся пред всѣми завше ворогами,

Же суть ангелы в мого отца миліонами.

А ты тераз, Ангеле, литости не маеш,

Же ся ты с тым келихом моцно наражаеш.

Ангел

Нещасливый я ангел, и сам, юж не знаю,

Як в том так срокгом разѣ поступити маю.

Вшак вѣдаеш, господи, же не моя воля,

Але отца твоего, небеснаго кроля.

Он тя выслал, он тобѣ рачил приказати,

Абы згола той келих тобѣ был отдати.

Если теды не приймеш (що и я жадаю),

Я ся назад з келихом зараз повертаю.

В пеклѣ

Будь милостив, господи, змилуй ся над нами,

Покажи милосердіе твое над вязнями!

Снийди с небеси, творче, выбав нас з неволѣ,

Учини, о господи, дость отцевской воли!

Христос

Стой, ангеле, почекай, дай ми чашу в руки!

Юже тыж ся отважу на всѣ тые муки.

Проразило мя пекло, ляменты и лканя,

Сердце мое зранили людскіе воланя.

И мает же так марне от мене створений

Человѣк загинути в пеклѣ зануреный?

И будет же так много смерть людьми радити,

Албо шатан пекелный будет ли губити?

Иду на крест, на кгроты, и теж на катовнѣ!

Стану пред судіями, умру неотмовнѣ.

Примітки

Подається за виданням: Франко І.Я. Зібрання творів у 50-и томах. – К.: Наукова думка, 1980 р., т. 28, с. 341 – 343.